دیمانەی رۆژنامەی رێگای کوردستان لەگەڵ سکرتێری گشتی یەکێتیمان هاوڕێ سمکۆ یەزدانپەنا

سكرتێری گشتی یەكێتی شۆڕشگێڕانی كوردستان پێی وایە كە بەستنی ئەو كۆنگرەیە جیاواز لەوەی ئاكامەكانی چۆن دەبن، بۆخۆی دیاردەیەكی گرنگ و هەنگاوێكی پڕبایەخ دەبێ ئەگەر هیچ لایەنێك و كەسایەتییەكی نەتەوەیی پەراوێز نەخرێ.

سمكۆ یەزدانپەنا سكرتێری گشتی یەكێتی شۆڕشگێڕانی كوردستان بە رێگای كوردستانی راگەیاند: "بۆیەكەمجار دەبێ لە مێژوودا، كە نوێنەرانی كورد لە چوارپارچەی كوردستان لە دەوری یەكتر كۆدەبنەوە بۆ راوێژكردن لەسەر پرسی نەتەوەیی، ئەمەش بۆخۆی دەستكەوتێكی گرنگ دەبێت بۆ كێشەی كورد كە هیوادارم ئاژاوەگێڕییەكانی وڵاتانی دراوسێ و كۆمەڵە كێشەیەكی ناوخۆیی نەبنە رێگر لەبەردەم بەستنی ئەو كۆنگرەیەدا".

بە باوەڕی سكرتێری گشتی یەكێتی شۆڕشگێڕانی كوردستانیش، یەكێك لەو پەیامە گرنگانەی كە كۆنگرەكە پێویستە ئاراستەی زلهێزەكانی جیهان و بەتایبەت ئەمریكای بكات، پێویستە ئەوەبێ كە ناكرێ بزووتنەوەیەكی شۆڕشگێڕانەی رزگاریخوازی گەلی كورد لە چەند پارچەیەكی كوردستاندا كە خەباتی چەكداری دەكەن مۆركی تیرۆریست بوونیان پێوە بلكێندرێت.

ناوبراو لەوبارەوە وتی: "بۆنموونە ناكرێ هێزێكی نەتەوەیی و رەسەنی وەك (پ.ك.ك) لەباكووری كوردستان كە لایەنێكی یەكلایی كەرەوەیە لە گۆڕەپانی سیاسی باكووری كوردستاندا و ناچار بە هەڵگرتنی چەك كراوە، بەهێزێكی تیرۆریست بناسرێت".

سكرتێری گشتی یەكێتی شۆڕشگێڕانی كوردستان درێژە بە قسەكانی دەدات و دەڵێ: "جیالەوەی كە ئێمە لەو كۆنگرەیەدا دەمانەوێ چ پەیامێك ئاراستەی رای گشتی جیهانی بكەین، لە كۆنگرەكەدا كورد لە یەكتر تێ دەگات و لەسەر گوتارێكی نەتەوەیی ساغ دەبێتەوە، چونكە بەهۆی ئەو دابەشكردنەی كە لە مێژوودا بەسەر گەلی كورد دا هاتووە، وایكردوە كورد لە هەر پارچەیەكی كوردستاندا باری دەروونی و سیاسی و فەرهەنگی تا ئەندازەیەك جیاواز بن، كەواتە لەو كۆنگرەیەدا بۆ یەكەمجار نوێنەرانی كورد لەیەك تێدەگەن و بەو خاڵە دەگەن كە كورد پێویستە خاوەنی چ گوتار و پەیامێك بێت بۆ دەرەوەی خۆی".

وتیشی "كورد لەو كۆنگرەیەدا شرۆڤەی بارودۆخی سیاسی خۆی دەكات و نوێنەرانی هەر پارچەیەكی كوردستان لەسەر ئەوە ساغ دەبێتەوە كە بۆ گەیشتن بە مافە نەتەوەییەكانی خۆی چ جۆرە خەباتێك دەستنیشان بكات".

سمكۆ یەزدانپەنا باوەڕی خۆیشی نیشاندا بەوەی كە ئەو كۆنگرە نەتەوەییەی هێزە كوردییەكان، كۆنگرەیەكی یەكلاكەرەوە دەبێت بۆ ساغكردنەوەو رێككەوتن لەسەر گوتاری نەتەوەیی بۆ گەلی كوردستان و وتیشی: "لەگەڵ فۆرمۆلەبوونی گوتاری نەتەوەییش هێزەكانی داگیركەری كوردستان و وڵاتانی جیهانیش باشتر لە داواكانی كورد تێدەگەن.

سەبارەت بەو پەیامەی كە لە كۆنگرەی نەتەوەییەوە پێویستە ئاراستەی ئەو وڵاتانە بكرێت كەكوردیان بەسەردا دابەش كراوە، سمكۆ یەزدانپەنا وتی: "پەیامی گەلی كورد بۆ داگیركەرانی كوردستان روونە، ئێمە نەتەوەیەكی چل ملیۆن كەسین و خاكێكی نزیك بە 500 كیلۆمەتر چوارگۆشەمان هەیە، وەك هەر نەتەوەیەك تر مافی خۆمانە جوگرافیای سیاسی و كیانی سەربەخۆی خۆمان هەبێ، داگیركەرانی كوردستان دەبێ ئەوە بزانن كە ئەمڕۆش نەبێ ئەوا سبەی وەك هەر نەتەوەیەكی تر دەگەینە ئەو ئاستەی كە خاوەنی نیشتیمانی خۆمان بین و چارەنووسمان بە دەستی خۆمان بێت".

ناوبراو وتیشی "داگیركەرانی كوردستان ئەگەر هەر لێمان تێنەگەن، ئەوا بۆ گەیشتن بە مافە ئینسانی و نەتەوەییەكانمان هەموو جۆرە شێوازەكانی خەبات و تێكۆشانمان لەبەردەمدا كراوەن و هەموو شێوازەكانی خەباتیش رەوان بە خەباتی چەكداریشەوە".

هەروەك جەختیشی كردەوە "شەڕی چەكداری شۆڕشگێڕانە، یەكێكە لە شێوازەكانی خەبات كە ئێمە وەك (یەكێتی شۆڕشگێڕانی كوردستان) هیچ كاتێك رەتی ناكەینەوە". 

• < پێشووتر