دیمانەی رۆژنامەی ئاڵای ئازادی لەگەڵ سکرتێری گشتی یەکێتیمان هاوڕێ سمکۆ یەزدانپەنا

سمكۆ یەزدانپەنا پێیوایە فشارەكانی ویلایەتە یەكگرتووەكانی ئەمریكا جدی نین بۆسەر كۆماری ئیسلامی ئێران، هەربۆیە ئەوانیش نەیانتوانیوە سوود لەو فشارانە وەربگرن و لەو بارەیەوە گوتی: "كێشەی ئەتۆمی ئێران كێشەیەكی نوێ نیە، لەساڵی 2006ەوە ئەم كێشەیە بەردەوامە،

لەگەڵ ئەوەشدا ویلایەتە یەكگرتووەكانی ئەمریكا جدی نییە لەسەر فشارەكانی بۆسەر كۆماری ئیسلامی ئێران، ئەمریكا فشارەكانی جدی نیە لەسەر ئەو وڵاتانەی كە دۆستی ئێرانیشن، بۆنموونە ئەمریكا رۆڵێكی گرنگی هەبوو لە هەڵگیرسانی بەهاری عەرەبی و ئەو وڵاتانەی كە مەبەستی بوو زوو سەرۆكەكانی لەناوبرد، بەڵام سوریا چونكە دۆستی ئێرانەو لەژێر ئابووری ئێراندا دەژیت، ئەمریكا فشارەكانی جدی نین بۆ لەناوبردنی رژێمەكەی بەشار ئەسەد، هەربۆیە پارتە ئۆپۆزیسیۆنەكانی رۆژهەڵات نەیانتوانیوە سوود لەو فشارە نێودەوڵەتیانە ببینن كە دەخرێتە سەر ئێران. گوتیشی ئەگەر ویلایەتە یەكگرتووەكانی ئەمریكا فشارەكانی جیدی بووایە بۆسەر ئێران، ئەوە ئۆپۆزیسیۆنی ئێرانی بە كورد و بەفارس دەیانتوانی چالاكی بكەن و فشار بخەنە سەر ئێران، چونكە وەك هەموو وڵاتەكانی تر ئۆپۆزیسیۆنی ئێرانی بەتەنیا ناتوانێت رژێمی ئێران بڕوخێنێت."

سەبارەت بەو پرسەی كە باس دەكرێت حزبە كوردیەكانی رۆژهەڵات هەماهەنگی نیە و یەكگرتوو نین یەزدانپەنا گوتی: "یەك نەبوونی حزبە كوردییەكانی رۆژهەڵات و ناكۆكییەكانی نێوانیان بۆ ئەو كاتە دەگەڕێتەوە كە پێش ئەوەی بێنە باشووری كوردستان یاخود هەرێمی كوردستان و ئەوكێشانە كە لە رابردوو هەیانبوو تا ئێستا بە ناچارەسەری ماوەتەوە، جگە لەمەش بیروڕای جیاوازی حزب و رەوتە سیاسییە كوردییەكان وایكردوە كە یەكگرتوو نەبن، بۆنموونە تا ئێستا هەندێك حزب و لایەنە سیاسییەكان لەگەڵ ئەوەن كە لە چوارچێوەی ئێران كێشەی كورد چارەسەر بكرێت و هەندێكیش لەگەڵ ئەوەن كە كێشەی كورد لەوە دەرچووە كە لە چوارچێوەی ئێران چارەسەر بكرێت."

• دواتر >